2023-cü ildə Azərbaycan Avtomobil Yolları Dövlət Agentliyi tərəfindən Kəlbəcər rayonu ərazisində yol tikintisi ilə bağlı elan edilən tenderin qalibi Cengiz İnşaat olub.
Layihə daha sonra altpodrat zənciri üzrə “Inter Service Group” MMC-yə, ordan isə “Goldvin İnşaat” MMC-yə ötürülüb.
Goldvin İnşaat ilə Inter Service Group arasında 20 sentyabr 2023-cü il tarixli rəsmi podrat müqaviləsi imzalanıb. Müqavilə üzrə:
Ümumi məbləğ: 35.880.539,63 AZN
İşlər faktiki icra edilib
50 nəfər işçi və texnika cəlb olunub
740.000 manatlıq iş yerinə yetirilib
Şirkətin təqdim etdiyi sənədlərə əsasən:
✔ Təhvil-təslim aktları mövcuddur
✔ Texniki icra sənədləri var
✔ Yazılı tələb məktubu göndərilib
Buna baxmayaraq, iddia olunur ki, bu günədək 740 min manat ödəniş edilməyib.
Məsələnin daha diqqətçəkən tərəfi isə budur: layihə rəhbərliyi tərəfindən bildirildiyinə görə, altpodratçı şirkətə 6 milyon manat avans ödənişi həyata keçirilib.
Bu vəsaitin hansı istiqamətdə xərcləndiyi sual doğurur.
İş artıq prokurorluq mərhələsindədir
Telexeber.az-a təqdim edilən rəsmi məlumatlara əsasən:
Müraciət əvvəlcə Daxili İşlər Nazirliyində qeydiyyata alınıb
Material Nəsimi rayon prokurorluğuna yönləndirilib
Hazırda icra Bakı Şəhər Prokurorluğuna həvalə edilib
Bu fakt göstərir ki, məsələ artıq hüquq-mühafizə orqanlarının nəzarətindədir.
Hazırda ictimaiyyət üçün açıq qalan əsas suallar:
740 min manatlıq faktiki görülmüş işin ödənişi niyə həyata keçirilməyib?
6 milyon manatlıq avans üzrə maliyyə araşdırması aparılırmı?
Material üzrə cinayət işi başlanıb, yoxsa ilkin araşdırma mərhələsidir?
Bu, tək bir şirkətin problemi deyil
Dövlət sifarişi ilə icra olunan milyonluq layihələrdə altpodratçıların hüquqlarının qorunması iqtisadi təhlükəsizlik məsələsidir.
Əgər müqavilə, akt və texniki sənədlər mövcuddursa, ödəniş edilməməsi hüquqi və maliyyə məsuliyyəti doğura bilər.
Telexeber.az olaraq məsələni diqqətdə saxlayacağıq.
Çünki dövlət layihəsində görülən işin haqqı ödənilməlidir.
