Bakının Binəqədi ərazisində yerləşən Binəqədi Lake Hotel uzun illərdir palçıq vulkanının tam ətəyində fəaliyyət göstərir. Geoloji baxımdan riskli sayılan bu zonada obyektin fəaliyyəti və son vaxtlar ərazi üzrə aparıldığı iddia edilən genişləndirmə işləri ictimai müzakirə mövzusuna çevrilib.
Məlum olduğu kimi, ötən ilin noyabr ayında hotel əməkdaşları ilə bağlı baş vermiş faciə cəmiyyətdə ciddi rezonans doğurmuşdu. Hadisə ilə əlaqədar təqsirli şəxslər məsuliyyətə cəlb olunub və hüquqi proses davam edir. Lakin məsələ təkcə hüquqi aspektlə yekunlaşmır. Burada daha geniş sual var – təhlükəli zonada fəaliyyət göstərən obyektlərdə təhlükəsizlik və məsuliyyət mexanizmləri necə işləyir?
Palçıq vulkanı zonasında aparılan işlər Telexeber.az-ın YouTube səhifəsində yayımlanan görüntülərdə palçıq vulkanı ərazisində ağır texnika ilə torpaq işlərinin aparıldığı, relyefin dəyişdirildiyi və ərazinin düzləşdirildiyi görünür. Əgər bu işlər həqiqətən də genişləndirmə məqsədi daşıyırsa, bu zaman bir neçə prinsipial sual yaranır:
Vulkan zonasında torpaq qatının qazılması hansı ekspert rəyinə əsaslanır?
Ekoloji və geoloji təhlükəsizlik rəyi mövcuddurmu?
Fövqəladə Hallar üzrə risk qiymətləndirilməsi aparılıbmı?
İşçilərin təhlükəsizliyi necə təmin olunur?
Palçıq vulkanı nə dərəcədə risklidir? Azərbaycan palçıq vulkanlarının sayına görə dünyada ön sıralardadır və Binəqədi zonası geoloji aktiv ərazi hesab olunur. Bu tip ərazilərdə:
Qəfil qaz sızmaları mümkündür
Torpaq çökmələri baş verə bilər
Vulkan aktivliyi dəyişkən xarakter daşıyır
Belə şəraitdə hər hansı tikinti və ya genişləndirmə işi ciddi elmi əsaslandırma tələb edir.
Məsələ cinayət deyil – məsuliyyət məsələsidir Hadisələrlə bağlı hüquqi prosedur öz axarı ilə davam edir. Ancaq əsas məsələ bundan sonra risklərin necə idarə olunacağıdır.
Təhlükəli zonada fəaliyyət göstərən hər bir obyekt üçün prioritet gəlir deyil, insan həyatı və təhlükəsizlik olmalıdır.
Əgər ərazi doğrudan da genişləndirilirsə, aidiyyəti qurumların – Ekologiya və Təbii Sərvətlər Nazirliyinin, Fövqəladə Hallar Nazirliyinin və digər müvafiq strukturların məsələ ilə bağlı ictimaiyyətə rəsmi açıqlama verməsi vacibdir.
Çağırış Bu yazı ittiham xarakteri daşımır. Məqsəd diqqəti potensial riskə yönəltməkdir.
Riskli zonalarda fəaliyyət göstərən obyektlər maksimum şəffaflıq nümayiş etdirməli, təhlükəsizlik sənədlərini ictimaiyyətə təqdim etməli və məsuliyyət prinsipini əsas tutmalıdır.
Çünki məsuliyyət – hadisə baş verəndən sonra yox, onun qarşısı alınarkən sübut olunur.
