Paytaxtda növbəti qalmaqalın mərkəzində yenə tikinti şirkəti dayanır. Bu dəfə söhbət Kristal Abşeron və onun “Park Əcəmi” layihəsindən gedir. İddialar isə sadə deyil — söhbət onilliklərlə yaşı olan ağacların məhv edilməsindən gedir.
Məlumatlara görə, tikinti zamanı yaşı 30 ildən çox olan “Eldar şamları” və digər qiymətli yaşıllıqlar kəsilib. Bu isə təkcə bir tikinti məsələsi yox, açıq-aşkar ekoloji hüquq pozuntusu və potensial cinayət faktı kimi qiymətləndirilir.
Şirkət isə gözlənildiyi kimi, ittihamları “əsassız” adlandıraraq məsuliyyətdən yayınmağa çalışır. Verilən açıqlamada bildirilir ki, guya ərazidə heç bir ağac kəsintisi aparılmayıb və bütün işlər qanun çərçivəsində həyata keçirilir.
Amma faktlar və real vəziyyət bu açıqlamalarla üst-üstə düşmür.
Ərazi sakinlərinin iddiaları, vizual dəyişikliklər və ortaya çıxan məlumatlar göstərir ki, məsələ heç də şirkətin təqdim etdiyi kimi “təmiz” deyil. Əksinə, ortada ciddi şübhələr və cavabsız suallar var.
Əsas sual budur: Əgər heç bir ağac kəsilməyibsə, bəs onilliklərlə mövcud olan yaşıllıqlar hara yoxa çıxıb?
Daha narahatedici məqam isə odur ki, məsələ ilə bağlı aidiyyəti qurumların susqunluğu davam edir. Ekologiya kimi həssas sahədə bu cür biganəlik isə ya məsuliyyətsizlikdən, ya da daha dərin səbəblərdən xəbər verir.
Bu isə artıq başqa bir sualı gündəmə gətirir: Görəsən kim kimi qoruyur?
Cəmiyyət isə cavab gözləyir. Çünki söhbət təkcə bir yaşayış kompleksindən yox, paytaxtın ekoloji balansından və qanunun aliliyindən gedir.
