Mingəçevir – Son dövrlərdə sosial şəbəkələrdə Mingəçevir Şəhər Mərkəzi Xəstəxanasının direktoru Ülfət Qurbanovun fəaliyyəti ilə bağlı əsassız iddialar və qarayaxma xarakterli paylaşımlar diqqət çəkir. Lakin aparılan araşdırmalar və yerində keçirilən sorğular bu iddiaların real faktlara söykənmədiyini göstərir.
Telexeber.az olaraq məsələni araşdırmaq üçün xəstəxanada vətəndaşlar arasında sorğu keçirdik. Sorğunun nəticələrinə əsasən, xəstələrin təxminən 85 faizi göstərilən tibbi xidmətin keyfiyyətindən razı qaldıqlarını bildirdilər. Xüsusilə qeyd olundu ki, xəstəxanada xidmətin şəffaf təşkili və pasiyentlərə diqqətli yanaşma təmin olunur.
Qeyd edək ki, xəstəxananın direktoru Ülfət Qurbanov xidmətin təşkilinə birbaşa nəzarət edir, vətəndaş məmnunluğunun təmin olunmasını əsas prioritet kimi müəyyənləşdirib. Onun rəhbərliyi dövründə müəssisədə nizam-intizamın gücləndirilməsi, şəffaflığın qorunması və xidmət keyfiyyətinin artırılması istiqamətində ciddi addımlar atılıb.
Bununla yanaşı, sorğuda iştirak edən vətəndaşların təxminən 15 faizi bəzi texniki məsələlərdən, xüsusilə növbə sistemində gözləmələrdən narazılıq etdiklərini qeyd etdilər. Bu isə daha çox ümumi səhiyyə sistemində mövcud olan yüklənmə ilə əlaqələndirilir.
Təəssüf doğuran məqam isə odur ki, heç bir fakt və sübuta əsaslanmayan iddialar sosial şəbəkələr vasitəsilə yayılaraq, müəyyən şəxslərin nüfuzuna xələl gətirməyə yönəlir. Bu cür yanaşmalar həm ictimai rəyə mənfi təsir edir, həm də jurnalistikanın əsas prinsiplərinə ziddir.
Telexeber.az olaraq bir daha vurğulayırıq ki, hər hansı məlumat yayımlanarkən onun faktlara əsaslanması, obyektiv araşdırılması və qarşı tərəfin mövqeyinin öyrənilməsi vacibdir. Əks halda, bu cür paylaşımlar cəmiyyətə deyil, yalnız çaşqınlığa xidmət edir.
Məsələ diqqətimizdədir və inkişafları izləməyə davam edəcəyik.
