Ağstafa rayon sakini, qazi Ələsgərov Rəsul Habil oğlu sosial durumu və işsizliklə bağlı yaşadığı çətinlikləri şəxsi sosial şəbəkə səhifəsində paylaşdığı video vasitəsilə ictimaiyyətin diqqətinə çatdırıb. Qazinin məqsədinin mövcud problemlərə diqqət çəkmək və aidiyyəti qurumların dəstəyini almaq olduğu bildirilir.
Rəsul Ələsgərovun sözlərinə görə, bu videodan sonra yerli icra strukturlarından ona qarşı təzyiq göstərildiyi iddia olunur. Qazi bununla bağlı yenidən video paylaşaraq baş verənlərə daha geniş şəkildə aydınlıq gətirib və yaşadığı vəziyyəti ictimaiyyətlə bölüşüb.
Məsələ ilə bağlı yayımlanan ikinci video hazırda Telexeber.az-ın rəsmi YouTube səhifəsində mövcuddur və sosial şəbəkə istifadəçiləri arasında müzakirələrə səbəb olub. İzləyicilər qazilərin sosial müdafiəsi, məşğulluğu və onlarla ünsiyyət məsələlərinin daha həssas yanaşma tələb etdiyini vurğulayırlar.
Qeyd edək ki, qazilərin sosial rifahının yaxşılaşdırılması dövlət siyasətinin əsas istiqamətlərindən biridir. Bu baxımdan, belə müraciətlərin diqqətlə araşdırılması, yaranmış narazılıqların dialoq və qanun çərçivəsində həll edilməsi cəmiyyət üçün mühüm əhəmiyyət daşıyır.
Telexeber.az olaraq qarşı tərəfin mövqeyini dərc etməyə hazırıq və ümid edirik ki, məsələ tezliklə müsbət həllini tapacaq, qazi Rəsul Ələsgərovun qaldırdığı problemlər aidiyyəti qurumlar tərəfindən diqqətlə dəyərləndiriləcək.
