Cəlilabad rayonunda yolların vəziyyəti ilə bağlı illərdir eyni suallar səslənir. Maraqlıdır ki, hər il yol çəkilişi, təmir və yenidənqurma işləri barədə məlumatlar yayılır, lakin rayonun bir çox küçə və kəndlərinə baş çəkəndə mənzərə tam fərqli olur.
Redaksiyamıza daxil olan müraciətlər əsasında rayonun müxtəlif ərazilərində apardığımız müşahidələr zamanı ortaya çıxan mənzərə sakinlərin narazılığını başa düşmək üçün kifayət edir. Bir tərəfdən görülən işlər barədə hesabatlar verilir, digər tərəfdən isə vətəndaşlar çala-çuxurlu, çökmüş və qısa müddətdə yararsız vəziyyətə düşən yollarla üz-üzə qalırlar.
Xüsusilə Fərid Əhmədov küçəsində müşahidə olunan vəziyyət ciddi suallar doğurur. Sakinlər bildirirlər ki, yeni çəkilmiş yol örtüyünün müəyyən hissələrində qısa müddət sonra problemlər yaranıb. Əgər doğrudan da keyfiyyətli iş görülübsə, onda bu qədər qısa zamanda ortaya çıxan qüsurların səbəbi nədir?
Cavad Xan küçəsinin vəziyyəti isə ayrıca bir problemdir. Bu küçəyə baxdıqda vətəndaşların narazılığının səbəbi aydın görünür. Rayonun mərkəzinə yaxın ərazilərdə belə problemlər qalırsa, ucqar kəndlərin vəziyyətini təsəvvür etmək çətin deyil.
Qarazəncir və Fətullaqışlaq kəndlərinə gedən yolların vəziyyəti ilə bağlı da şikayətlər davam edir. Sakinlər bildirirlər ki, yol problemi təkcə rahatlıq məsələsi deyil, həm də sosial və iqtisadi inkişafın qarşısını alan əsas amillərdən biridir. Yol olmayan yerdə inkişafdan danışmaq nə dərəcədə mümkündür?
Ən düşündürücü məqam isə odur ki, hər il yol təsərrüfatına milyonlarla manat vəsait ayrılır. Bəs niyə nəticə göz önündə görünmür? Niyə bəzi yollar bir neçə ildən deyil, bir neçə mövsümdən sonra yenidən problemə çevrilir? Niyə vətəndaşlar eyni məsələləri təkrar-təkrar gündəmə gətirməyə məcbur qalırlar?
Cəlilabad sakinləri dəbdəbəli hesabatlar yox, keyfiyyətli yollar görmək istəyirlər. İnsanları maraqlandıran məsələ kiminsə haqqında yayımlanan tərif dolu yazılar deyil. Vətəndaş üçün əsas göstərici asfaltın keyfiyyəti, yolun davamlılığı və görülən işin nəticəsidir.
Bu gün Cəlilabadda səslənən əsas sual budur: görülən işlərlə bağlı təqdim olunan mənzərə ilə vətəndaşların gündəlik qarşılaşdığı reallıq niyə üst-üstə düşmür?
Aidiyyəti qurumların və məsul şəxslərin bu suallara aydın cavab verməsinin vaxtı çoxdan çatıb.
Telexeber.az
